China yaonya kutetea maslahi yake dhidi ya Marekani

Haki miliki ya pichaREUTERS

Image captionRais Trump ametangaza mpango wa kutangaza ushuru mpya dhidi ya China wa hadi $60bn dhidi ya bidhaa za China

China imeionya Marekani kwamba itatetea maslahi yake kuhusu biashara kulingana na chombo cha habari cha China baada ya rais Donald Trump kuwekea ushuru bidhaa za China.

Matamshi hayo yanajiri katika simu kati ya makamu wa chama tawala cha China Liu He na waziri fedha wa Marekani Steven Mnuchin. Bwana Trump ametangaza mipango ya kuziwekea ushuru wa hadi $60bn bidaa za China ikiilaumu China kwa wizi wa ubunifu.

Hatua hiyo imesababisha wasiwasi katika soko la hisa na hofu ya kuzuka kwa vita vya kibiashara. Bwana Liu ambaye ni mshauri mkuu wa maswala ya kuuchumi wa rais Xi Jinping aliambia Mnuchin kwamba Beijing iko tayari kutetea maslahi yake ya kitaifa lakini ikatumai kwamba pande zote mbili hazitakuwa na upendeleo na kufanya kazi pamoja kulingana na chombo cha habari cha Xinhua.

• Marekani yawawekea vikwazo makampuni ya Urusi na China
• Trump atarajiwa kutangaza vikwazo dhidi ya China
• Marekani kuimarisha vikwazo dhidi ya Korea Kaskazini

Wakati wa mazungumzo ya simu, ambayo yanadaiwa kuwa ya ngazi ya juu kati ya serikali hizo mbili tangu rais Trump kutangaza ushuru huo siku ya Alhamisi, bwana Liu pia aliishutumu Marekani kwa kukiuka sheria za kimataifa kufuatia uchunguzi wake kuhusu hatua ya China kuigiza utengezaji wa bidhaa zake.

Huku kukiwa na wasiwasi kuhusu biashara, mkurugenzi mkuu wa shirika la kibiashara duniani WTO Roberto Azevedo alionya kuwa vikwazo hivyo vipya vya kibiashara vitaathiri uchumi duniani. Bwana Trump hatahivyo amesema kuwa hatua ya Marekani kuongeza ushuru dhidi ya bidhaa za China imeanza kuzaa matunda.

Mataifa mengine yameanza kujadiliana mikataba yenye usawa na Marekani , rais huyo alisema siku ya Ijumaa.

Kufuatia hatua hiyo ya rais Trump, China ilisema kuwa ilikua inapanga kulipiza kisasi kupitia vikwazo vya ushuru dhidi ya Marekani wa thamani ya $3bn, ikiwemo ushuru dhidi ya bidhaa za kilimo pamoja na aliminium.

Beijing imeionya Marekani kwamba haiogopi vita vya kibiashara. lakini ikasema kuwa inatumai kuzuia vikwazo hivyo kupitia majadiliano.