Mwakilishi Zanzibar atakiwa kuvunja nyumba yake kupisha ujenzi wa barabara

WAJUMBE wa kamati ya Mawasiliano na Ujenzi ya baraza la Wawakilishi Zanzibar, wametoa wiki moja kwa mwakilishi wa Jimbo la Ole, Mhe. Mussa Ali Mussa, kuvunja sehemu ya nyumba yake ambayo imekwamisha ujenzi wa barabara ya Ole-Kengeja.

Mwenyekiti wa kamati hiyo Mhe. Hamza Hassan Juma ambae pia ni Mbunge wa Kwamtipura, ameeleza kusikitishwa na hatua ya mwakilishi huyo kushindwa kuvunja nyumba yake licha ya kulipwa fidia tangu Novemba 2 mwaka jana.

        Ameongeza kuwa haipendezi kwa kiongozi kukwamisha kwa makusudi harakati za maendeleo zilizopangwa na serikali kwa ajili ya wananchi.     

Pamoja na hayo amemtaka msimamizi wa mradi huo kuhakikisha wananchi waliobaki wanalipwa fidia na kuhakikisha nyumba zilizothibitishwa zinavunjwa ili ujenzi wa barabara hiyo kuwa wa uhakika.

Mradi wa barabara ya Ole-Kengeja mpaka kukamilika kwake unatarajiwa kugharimu kiasi cha shilingi Bilioni 11.