Makamo wa Rais Zanzibar ameagiza uongozi wa Hospitali ya Mnazi mmoja Kuharakisha matengenezo mashine ya uchunguzi wa maradhi ya Tumbo

Makamu wa Pili wa Rais  wa Zanzibar Balozi  Seif Ali  Iddi ameuagiza Uongozi wa Hospitali Kuu ya Mnazi Mmoja kuharakisha matengenezo ya Mashine ya uchunguzi wa Maradhi ya Matumbo (Utra sound) ili kupunguza msongamano wa Wagonjwa wanaohitaji huduma hizo.

        Ametoa agizo hilo alipofanya ziara fupi kukagua chumba cha uchunguzi wa maradhi ya Matumbo katika Hospitali Kuu ya Mnazi Mmoja ambapo Mashine moja kati ya Mbili zilizomo ndani ya chumba hicho imeharibika kwa zaidi ya miezi miwili sasa.

Amesema Hospitali Kuu ya Mnazi Mmoja ndio kimbilio pekee la Wananchi wote wa Zanzibar  wanalolitegemea  kukidhi  mahitaji  yao ya  dharura wakati  wanapokumbwa na matatizo mbali mbali ya kiafya.

Ameongeza kuwa mabadiliko ya kimaisha katika  mazingira ya matumizi yasiyo sahihi ya vyakula mchanganyiko wanavyotumiwa Wanaadamu yamechangia ongezeko la mardhi tofauti yakiwemo yale yanayowasumbua akina Mama ya Matumbo.

Kwa upande wake Mkurugenzi wa Hospitali hiyo Dkt. Ali Salum Ali amesema juhudi za matengenezo za Mashine hiyo tayari zimeshachukuliwa  na Uongozi huo ili kuurejesha mpangilio wa huduma hizo uwe wa kawaida.

Hata hivyo Dr. Ali amesema kilichochelewesha kukamilika kwa matengenezo hayo ni mtaalamu wa kuifanyia marekebisho Mashine hiyo ambaye analazimika kutoka nje ya Zanzibar.