Wahanga wa mafuriko wa mji wa Ifakara wilayani Kilombero wameiomba serikali kuchukua hatua za makusudi kujenga tuta la mto Rumemo

Wahanga wa mafuriko wa mji wa Ifakara wilayani Kilombero wameiomba serikali kuchukua hatua za makusudi kujenga tuta la mto Rumemo kufuatia mto huo kuvunja kingo zake na kumwaga maji katika makazi ya wananchi na kusababisha nyumba nyingi kuzingirwa na maji huku nyingine zikianguka jambo linaloweza kusababisha mlipuko wa magonjwa mbalimbali ikiwemo kipindupindu.

Baadhi ya waathirika wa mafuriko wilayani Kilombero wameendelea kupata adha ya maji kufuatia nyumba zao bado kuzingirwa na maji jambo linalosababisha kuendelea kuwafungia watoto ndani na wengine kuwapeleka kwa ndugu zao ambapo wameomba serikali kuweka vifusi katika nyumba zilizo zingirwa na maji pamoja na kujenga tuta la mto Rumemo. 

 

Kwa upande wake mkuu wa wilaya yaKilombero Bw.Lephy Gembe amesema serikali ipo katika mpango wa kuhakikisha wahanga wote wanapewa viwanja pamoja na watu wanaoishi katika mazingira ya kujaa maji huku Mbunge wa jimbo la Kilombero Peter Lijualikali akisema ipo haja ya kuhakikisha mto Rumemo unajengewa tuta ili wananchi wa Ifakara waondokane na adha hiyo.