Mbowe wakiteta jambo na Pinda.PICHA|MAKTABA.
Mbowe alisema jana mjini hapa kwamba, wako tayari kwenda jela na hata ikibidi kufa kwa kupambana na ufisadi ndani ya Serikali.
Pinda alitoa pendekezo hilo baada ya wabunge wa
upinzani ambao pia ni wanachama wa Umoja wa Katiba ya Wananchi (Ukawa),
kususia Bajeti ya Wizara ya Nishati na Madini na kutoka bungeni.
Baada ya kupitishwa kwa bajeti ya wizara hiyo,
Pinda alipendekeza kubadilishwa kwa kanuni ili kuwadhibiti wabunge wa
upinzani kutoka nje ya Bunge mara kwa mara.
“Inawezekana kanuni zinaruhusu... lakini
haiwezekani kila mnaposhindwa hoja muone njia rahisi ni kutoka nje,
nasema hivi, Watanzania hawawezi kukubaliana na hili,” alisema Pinda
Ijumaa iliyopita na kuongeza:
“Tabia hii inayoendelea kujengeka siyo nzuri.
Tuombe kanuni za Bunge zirekebishwe kwa sababu Bunge linaonekana halina
watu wakati hao waliotoka hawana sababu za msingi.”
Akizungumzia pendekezo hilo, Mbowe ambaye pia ni
Mwenyekiti wa Chadema alisema wabunge wa kambi hiyo wako tayari kupokea
adhabu yoyote itakayotokana na kubadilishwa kwa kanuni za kudumu za
Bunge hilo.
“Katika kutafuta haki, ustawi na heri ya taifa
letu na ya vizazi vijavyo vya nchi yetu, tuko tayari siyo tu kukabili
adhabu zitakazotokana na kubadilishwa kwa kanuni, bali hata kwenda jela
na kufa.
“Ni heri kufa umesimama kwenye haki kuliko kuishi ukiwa umesimama kwenye ubatili.
Tunafahamu gharama na mateso tunayopitia kwa ajili
ya kupinga ufisadi na ubadhirifu. Tumeamua kupambana mpaka mwisho
hatimaye haki na ukweli vitatuweka huru.”
Baada ya kususia Bunge Ijumaa iliyopita, Mbowe
alikutana na waandishi wa habari na kudai kuwa kulikuwa mkakati mahususi
wa kuwazomea na kuwatukana.
“Tulitambua kwamba kuna mkakati mkubwa
ulioandaliwa baina ya Serikali, uongozi wa Bunge na wabunge wa CCM
kujaribu kufukia ufisadi mkubwa ambao unaikumba ya Wizara ya Nishati na
Madini,” alisema Mbowe.
Alisema wabunge wa upinzani walipojaribu kuanika uozo huo, kiti
cha Spika kilitumia nguvu za ziada kuwataka watoe ushahidi papo hapo.
Alisema badala ya kujadili hoja za msingi kama
kashfa ya Akaunti ya Escrow inayofikia Sh200 bilioni, wabunge wa CCM
waliamua kuungana na Serikali ili kufifisha hoja za wabunge wa upinzani.
Mbowe alisema yapo maazimio mbalimbali ya Bunge
ambayo hayajatekelezwa kikamilifu na kutaja sakata la Katibu Mkuu wa
zamani wa Nishati na Madini, David Jairo na kashfa ya Richmond mambo
ambayo alisema hadi leo, Bunge limeshindwa kudai utekelezwaji wake.MWANANCHI
Post a Comment