Atletico Madrid walaza Marseille 3-0 na kutwaa Europa League

Haki miliki ya pichaGETTY IMAGES

Image captionAtletico Madrid wameshinda Europa League mara tatu, ambapo wanashikilia rekodi sasa na Sevilla

Antoine Griezmann alifunga mabao mawili na kuwawezesha Atletico Madrid kuwachapa Marseille 3-0 mjini Lyon, Ufaransa na kushinda Kombe la Europa League mara yao ya tatu katika kipindi cha miaka tisa.

Mshambuliaji huyo wa kimataifa wa Ufaransa alianza kwa kufunga baada ya Andre Zambo Anguissa kutomakinika na mpira dakika ya 21 na kisha akafunga la pili dakika ya 49.

Nahodha wao Gabi alifunga bao la tatu dakika ya 89 na kuwawezesha vijana hao wa Madrid kushinda kombe hilo ambalo pia walilitwaa miaka 2010 na 2012.

• Diego Simeone ajifunga Atletico mpaka 2020

Matokeo yangelikuwa tofauti iwapo mshambuliaji wa Marseille Valere Germain angetumia nafasi yake mapema kwenye mechi kabla ya Griezmann kufunga.

Nahodha wa Marseille Dimitri Payet aliondoka uwanjani akichechemea kutokana na jeraha baada ya kukaa uwanjani nusu saa pekee, na sasa huenda akakosa kushiriki Kombe la Dunia.

Bila kiungo huo wao, Wafaransa hao waliwatishia Atletico mara moja pekee, mshambuliaji wa zamani wa Fulham Kostas Mitroglou alipogonga mlingoti wa goli kwa mpira wa kichwa.

Haki miliki ya pichaGETTY IMAGES

Image captionAntoine Griezmann amewafungia Atletico Madrid mabao 30 msimu huu

Atletico wamekuwa moja ya klabu ambazo zimekuwa zikifanya vyema sana Ulaya miaka ya karibuni.

Walifanikiwa kuzima ubabe wa Barcelona na Real Madrid La Liga kwa kushinda ligi 2013-14.

Kwa sasa wanashikilia nafasi ya pili ligi kuu Uhispania wakiwa wamesalia na mechi moja na wamo mbioni kumaliza katika tatu bora kwa msimu wa sita mfululizo.

Katika kipindi hicho, wamefika fainali Ligi ya Klabu Bingwa Ulaya mara mbili, ambapo walishindwa na wapinzani wao wa jiji Real Madrid.

• Diego Costa awazuia Arsenal kufika fainali Europa League

• Costa arejea kwa kishindo Atlético Madrid

Meneja wao Diego Simeone alitazama mchezo huo kama shabiki kwani anatumikia marufuku ya mechi nne baada ya kuadhibiwa wakati wa mechi kati ya nusufainali kati ya Arsenal na Atletico.

"Nina furaha sana," alisema Griezmann baada ya mechi.

"Nimekuwa nikitia bidii kwa sababu ya tukio hili kwa miaka mingi. Niliondoka nyumbani nilipokuwa na miaka 14 juu ya hili. Tutasherehekea. Familia yangu iko hapa."

Haki miliki ya pichaGETTY IMAGES

Image captionMashabiki wa Marseille waliondoka Lyon kwa masikitiko

Haki miliki ya pichaREX FEATURES

Image captionGriezmann akisherehekea