serikali ya zanzibar yaahidi kuongeza vituo vya Amali kupunguza tatizo la ajira

        Mjumbe wa halmashauri kuu ya taifa ya Chama cha Mapinduzi CCM Balozi Seif Ali Iddi amesisitiza Serikali ya Mapinduzi ya Zanzibar itahakikisha inatatua tatizo la ukosefu wa ajira kwa vijana kwa kujenga vituo viwili vya mafunzo ya amali Unguja na Pemba.

makamo wa pili wa rais wa Zanzibar Balozi Seif Ali Iddi akikabidhiwa picha ya raisi wa kwanza wa Zanzibar Abed Amani Karume wakati akiwapokea vijana wa uvccm katika kilele cha matembezi yao ya  kuazimisha miaka 53 ya mapinduzi.

        Akifunga matembezi yaliyoandaliwa na jumuiya ya vijana wa chama hicho UVCCM kuazimisha miaka 53 ya mapinduzi ya Zanzibar katika viwanja vya Afisi kuu ya CCM Kiswandui mjini Unguja, Balozi Seif ambae pia ni makamo wa pili wa Rais wa Zanzibar amesema kujengwa kwa vituo hivyo itasaidia kutoa fursa kwa wananchi kujiajiri wenyewe.
        Awali mwenyekiti wa UVCCM Taifa mhe. Sadifa Juma ameiomba Serikali kutokuwavumilia watendaji wake ambao wameonesha kuyabeza mapinduzi matukufu ya Zanzibar hatua aliyoitaja kurudisha nyuma maendeleo ya nchi.
        Mapema akiwasalimia vijana zaidi ya 400 kutoka mikoa mbalimbali ya Zanzibar na Tanzania Bara walioshiriki matembezi hayo, waziri mwenye dhamana ya masuala ya muungano Mhe. January Makamba amewasihi vijana kuienzi CCM kutokana na msingi wa mapinduzi na muungano wa Tanzania kutegemea uwepo madarakani wa chama hicho.
       

Kilele cha matembezi hayo kimehudhuriwa na viongozi mbalimbali wa CCM na jumuiya zake akiwemo Naibu katibu mkuu CCM Zanzibar Vuia Ali Vuai, makamo mwenyekiti UVCCM Mboni Mahita, kaimu katibu mkuu UVCCM Shaka Hamdu Shaka na kaimu naibu katibu mkuu UVCCM Zanzibar Abdulghaffar Idrissa.