Obama atoa hotuba ya mwisho kama rais wa Marekani

Rais Barak Obama

Rais Barack Obama ametoa hotuba yake ya mwisho kwa taifa muda mfupi uliopita katika jimbo la Chicago, ambapo sehemu kubwa ya hotuba yake imejikita katika kuainisha mafanikio yake katika kipindi chake cha urais.

Rais Obama amesikika akisema, ilipoanzia ndipo itakapoishia. Akiwa na maana kwamba Chicago ndipo alipoanzia siasa zake akiwa pamoja na Michelle Obama, na alipata ushindi mkubwa sana katika mji huo. Kwa hiyo, ni eneo ambapo lina historia muhimu katika maisha yake ya kisiasa lakini pia ni kama njia moja wapo ya kusema asante kwa wana Chicago.

Hotuba hii ina tofauti kubwa sana na zile nyengine, hii ikiwa ni hotuba ya mwisho ya Obama kama rais wa Marekani.

Hotuba hii imeangazia mambo mbali mbali ikiwemo kuwataka wamarekani wawe na umoja.

Rais Obama pia ametumia muda wake mwingi sana kuzungumzia demokrasia na kusema kwamba katika kipimo cha demokrasia watu wanaweza kuanguka kwa pamoja au kuinuka kwa pamoja.

Kuhusu mahusiano ya kimataifa, amezungumzia jinsi alivyoweza kutatua mgogoro wa Iran na mradi wake wa nuklia, lakini pia ameweza kuhuisha tena uhusiana wa Marekani na Cuba.