Ligi ya Alizeti cup hatua ya nusu fainali jana septemba 6
imeweza kumalizika kwa kupigwa mchezo mmoja kati ya Sido fc dhidi ya Kitogoro
fc katika uwanja ya wilaya ya Liwale mkoani Lindi.
Katika mchezo huo timu ya Sido fc iliweza kuibuka na ushindi
wa magoli 2 kwa bila huku goli la kwanza Sido fc likifungwa na Kibiga Kibiga
katika dakika ya 19 goli lilodumu mpaka mapumziko ya dakika 45.
Katika kipindi cha pili Kocha wa timu ya Kitogoro fc,Abdelehemani
Ndwimbwage aliweza kufanya hisabu za kubadilisha wachezaji lakini juhudi hizo
hazikuzaa matunda baadae alizidiwa mbinu
za kimchezo na kocha wa Sido fc, Mohamedi Hema, kuweza timu ya Sido fc
ikiongeza goli la pili katika dakika ya 69 lililofungwa na Saidi Mohamedi mpaka
dakika 90 zinakamilika Sido fc waliweza kuibuka na ushindi wa magoli 2-0.
Septemba 5 kulikuwa na mchezo wa hatua ya nusu fainali kati
ya timu ya Hawili dhidi ya New Boys mchezo uliotimua vumbi katika uwanja wa
wilayani hapa na Hawili fc waliibuka na ushindi wa magoli 9-0 katika kipindi
cha kwanza timu ya Hawili iliweza kuongoza magoli 5-0.
Katika kipindi cha pili timu ya Hawili fc iliweza kuongeza
magoli 4,magoli ya Hawili fc yalifungwa na Faraja Hasani katika dakika ya 10,24
na 41,Imani Mbesigwa dakika ya 37,Faustin Ibrahim dakika ya 45,57 na dakika 80
na magoli mawili yakifungwa na Ramadhani Hashimu kaika dakika ya 71 na dakika
ya 89.
Kwa mujibu wa mratibu wa mashindano,Selemani Nangomwa alisema
hatua ya mchezo wa kumpata mshindi wa tatu mchezo utapigwa septemba 8 kati ya
timu ya New Boys dhidi ya Kitogoro fc katika uwanja wa wilayani hapa.
Mchezo wa fainali utatimua vumbi septemba 9 kati ya timu ya
Hawili fc dhidi ya watani wao wa jadi Sido fc mchezo unatarajiwa kuwa na
mashabiki wengi na utaweka rekodi mpya ya kuwa na watazamaji wengi zaidi
kutokana na timu hizo kuwa na mashabiki wengi sana kutoka kila viunga vya
wilayani.
Baadhi ya wadau wa soka wakizungumza na Liwale Blog
walishauri siku ya mchezo wa fainali kati ya Hawili fc dhidi ya Sido fc
kuimalishwe ulinzi kwakuwa mashabiki watakuwa wengi sana wakiongeza baadhi ya
mashabiki hupenda kukaa maeneo ya golini na kumsemesha golikipa.
Zawadi zimetajwa zitakazotolewa kwa washindi mbalimbali
mshindi wa kwanza atapewa pesa taslimu shilingi laki tano (500,000) pamoja na
kombe lenye thamani ya shilingi laki tatu na elfu hamsini (350,000) pamoja na
jenzi,nafasi ya pili atapewa shilingi laki mbili na elfu hamsini (250,000) pamoja
na jenzi na nafasi ya tatu atapata shilingi laki moja na elfu hamsini (150,000)
pamoja na jenzi.
Zawadi zingine zitatolewa kwa mchezaji bora,mfungaji
bora,golikipa bora,kocha bora na mwamuzi bora kila mmoja katika nafasi hii
atajinyakulia shilingi elfu ishirini (20,000).
Ligi hii ni maalum kwa kuhamasisha wakulima wa wilayani hapa,walime
zao jipya la Alizeti ambalo ni maarufu kwa mikoa ya Dodoma,Singida na Shinyanga.
Post a Comment