Maneno Madogo Yenye Madhara Makubwa Ya Kukufanya Usifikie Mafanikio Ya Ndoto Yako

        

Maneno yako ndio yanaonyesha wapi unapoelekea, na vitendo vyako vinaleta uhalisi wa kile ulichokipanga. Hivyo basi, kumbe kwa maneno ya kinywa cha mtu unaweza kutambua mtu atakuwa wapi kwa miaka mitano badae, na kwa uamuzi wake wa kuchukua hatua ya utekelezaji utaona kwa uhalisi kile alichokuwa akikisema na kumaanisha. 

Ukweli ni kwamba hauwezi kuwa tofauti zaidi ya vile unavyowaza, unavyosema na kuchukua hatua kila siku juu ya kile ulichotaka kufanya, hata kama ni kidogo namna gani; tambua huleta matokeo halisi haijalishi ni matokeo chanya au ni matokeo hasi.

Kama ukiamua kuwaza na kuona mambo chanya uyatakayo katika maisha yako, tena kwa imani; basi utakuwa umejiweka katika mazingira mazuri ya kuweza kukabiliana na changamoto ya kutokushindwa juu ya kule unapoelekea katika maisha yako. Suala la kushindwa kutimiza mipango kadhaa kwenye muda uliojiwekea linaweza kujitokeza kwa wakati fulani, hasa kama mipango hiyo imekuwa na njia pana za utekelezaji na kuhitaji rasilimali nyinginezo zaidi zilizokuwa ngumu kupatikana kwa wakati huo. Lakini tambua kuwa ndoto ya mtu haibadiliki, mipango yako itabadilika ila si ndoto yako.

Badilisha mwelekeo wa namna unavyoona ndani yako; badilisha maneno unayotamka na sababu unazozitoa katika kufikia ndoto yako. Anza kuona upekee na utofauti ulionao ndani yako ambao Mungu amekupa kwa ajili ya kufikia ndoto na kusudi la kuwepo kwako hapa duniani. Haya ndio maneno madogo yenye madhara makubwa ya kukufanya usifikie mafanikio ya ndoto yako uliyonayo.

1: Siwezi.

Neno siwezi limekuwa kama ukuta wa kuwazuia watu wengi kushindwa kuendelea katika maisha yao na kufikia hatua ya mafanikio makubwa katika malengo na mipango yao ya kila siku waliyonayo. Wapo watu wenye mipango mizuri waliyoipanga lakini kila unapojaribu kuwapa mawazo mazuri zaidi ya kuwasaidia kuwasogeza katika kupiga hatua juu ya kule wanapotaka kuelekea, watakuambia hawawezi kufanya kile unachowashauri kufanya. Unakutana na kijana aliyemaliza chuo kikuu na amekaa nyumbani kwa kukosa ajira, lakini unapojaribu kumshauri atafute namna ya kujishughulisha hata kwa biashara ndogo ndogo ili kutokupoteza muda wake; kijana huyo atakujibu siwezi kufanya biashara kwa sababu mimi sikusomea masuala ya biashara, na anazidi kukuambia unajua biashara ni kipaji mkuu.

Hapo panakuwa ni vigumu kuendelea kutoa msaada kwa sababu unaona kabisa mtu huyu tayari amekwisha kutanguliza mawazo na fikira za kushindwa juu ya jambo unalomshauri kufanya. Jambo hili ndio linalowasumbua watu wengi hata kushindwa kuona matokeo chanya na mafanikio wanayoyahitaji juu ya maisha yao. Usitegemee kuona mafanikio katika maisha yako kama tayari unaona kushindwa ndani yako. Jifunze kujaribu kila kitu kinachofaa na chenye kuleta matokeo chanya katika maisha yako; heri kujaribu kuliko kukaa.

2: Naogopa.

Kila unapoambiwa uende ukasome uongeze ujunzi mpya unasema naogopa nitaacha vipi familia yangu; mara naogopa kukaa mbali na familia yangu kama nikienda kusoma. Hatimaye wenzako ulionao ofisi moja wanazidi kupanda cheo na kukupita, hii ni kwa sababu wewe umeshindwa kujiongeza na kurudi darasani kwa ajili ya kuongeza ufahamu kwa kisingizio cha kuogopa utaachaje familia nyuma yako.

Hofu ya kushindwa, hofu ya kufanya mambo makubwa, hofu ya kukataliwa na kuona aibu, hofu ya kutangulia mbele kwa niaba ya wengine kama vile kuwa kiongozi; hii ndio inayokufanya usifikie ndoto yako nzuri uliyonayo ndani yako kwa muda mrefu tangu miaka na miaka. Jiulize miaka na miaka unaona aibu kufanya jambo zuri ulilonalo ndani ya moyo wako kwa kisingizio cha kuogopa watu au kuona aibu; Swali, Je, kwa namna hiyo utafanikiwa au utakula lini matunda ya ndoto yako uliyonayo? Je, Utaacha historia gani katika dunia kama unaogopa kuishi na kutimiza ndoto ya maisha yako hapa duniani. Badilika na kuwa mwenye ujasiri na njaa ya kufanikiwa.

3: Nitafanya kesho.

Napoleon Hill aliwahi kusema kuwa, “Don’t wait. The time will never be just right.” (Usisubiri. Hakuna kamwe muda muafaka wa kufanya unachotaka. Akimaanisha kuwa muda wa kufanya unachotaka ni sasa na si kesho. Wapo watu wengi sana wamekuwa ni wazuri katika kupanga na kuongelea mipango yao waliyonayo kila siku, lakini si watu wepesi wa kuchukua hatua juu ya mipango hiyo waliyonayo. Watu hawa kila unapowafuata na kuwauliza ni kwa nini hawachukui hatua juu ya jambo husika, watakuambia wanasubiri mambo yao yakae sawa, kwa hiyo watafanya kesho au badae au mwakani.

Walt Disney aliwahi kuandika maneno mazuri yanayosema, “The way to get started is to quit talking and begin doing.” (Njia nzuri ya kuanza kufanya au kutekeleza unachotaka ni kuacha kuongea zaidi bali kufanya au kuchukua hatua). Kama bado una miaka mitano au kumi unasema utaoa mwakani na umri wako wa kuoa umefika na hauna kisingizio kwa nini hujaoa hadi leo, basi ujue una matatizo mahali unahitaji uyaweke sawa kabla hayajawa makubwa zaidi. Badilika acha kusema nitafanya kesho, nitafanya kesho. Anza kufanya leo tena anza sasa baada ya kumaliza kusoma mahali hapa. Huwezi kuibadili kesho kama hutoweza kuibadili leo.

4: Sina kipaji chochote.

Kuna rafiki yangu niliwahi kuishi nae, yeye alikuwa ni kama mfia maji; anasema hana kipaji chochote kile anachoweza kukitumia kama sehemu ya kumtambulisha. Nikamuuliza haujui hata kuimba, akanijibu sijui kwani hata sauti niliyonayo haifai ni mbaya. Nilishangaa baada ya kuendelea kumuhoji kwenye maeneo mengine na kila nilipomuhoji katika maeneo hayo alinijibu hana na hata hawezi. Sijui kwa upande wako labda nikuulize na wewe swali hili; Je, una kipaji gani unachoweza kukitumia kukutambulisha mjini au mahali popote pale uendako hapa duniani? Kama jibu lako ni kama la huyo rafiki yangu, basi unayo kazi.

Mara nyingi tumeona kipaji ndio kinachomtoa mtu na kumpa heshima kila mahali anapokuwa au mahali anapokwenda. Mimi kipaji changu ni uandishi, kutoa ushauri na kufundisha, ambayo mara nyingi ni mambo yanayoendana. Swali ninalokuacha nalo tena ni hili; Je, wewe una kipaji gani unachokijua hadi sasa unacho? Kipaji pekee ndio chenye uwezo wa kukupa fedha, heshima na kukufanya kuwa kivutio kwa wengi. Amua leo kugundua kipaji chako na acha kusema hauna kipaji; hakuna mtu aliyezaliwa duniani iwe usiku au mchana ambaye Mungu hakumpa kipaji au kitu chochote kile cha kufanya.

5: Umri wangu bado mdogo.

Wapo wanaosema umri wao ni mdogo na wapo wanaosema pia hawawezi kufanya tena jambo fulani kwa sababu umri wao umekwenda yaani miaka yao ya kufanya jambo husika imepita. Yote kwa yote sijui wewe upo upande gani. Ila nataka kusema zaidi na wewe unayesema umri wako bado ni mdogo na hauwezi kufanya jambo fulani kama vile, kuanza biashara au kujiajiri, kuwa kiongozi wa nganzi fulani nchini, kushauri watu, nakadhalika. Huo ni uongo ambao kamwe haustahili kuukubali kabisa ndani ya moyo na akili yako; nataka nikumbie kama unauwezo wa kusoma makala hii au kuandika hata herufi moja; basi tambua wewe unafaa kufanya kile unachotaka (nielewe vizuri hapa kile unachotaka) kufanya maishani mwako. Sio lazima ukitimize sasa bali unaweza kuanza kutengeneza mazingira ya kukifatilia sasa na kukijengea misingi mizuri kuanzia sasa.

6: Elimu yangu ndogo au hainitoshi.

Kama elimu yako ni ndogo kwa nini usiweke malengo na mipango leo hii ya kurudi kusoma tena na uchukue hatua ya haraka ya kufanya hivyo? Usitoe nafasi ya jambo lolote linalowezekana kutimiza mbele yako kuwa kisingizio cha kukuzuia kufikia ndoto yako uliyonayo moyoni. Kama una nafasi ya kusoma hakikisha unasoma ili kuepuka kisingizio cha elimu kuchukua nafasi ya kufikia ndoto na maono yako. Amua kuweka uamuzi upya wa kurudi darasani; amua kuongeza elimu na ujuzi wako hata kwa kusoma kozi fupi za nje ili uendelee kusoma huku ukifanya mambo yako mengine uliyonayo. Badilika na zaidi amua kukimbia visingizio kama hivi visivyo na tija, kama utakuwa fedha tafuta mazingira ya kuongeza ujuzi na maarifa.

Hata kwako wewe ambae unasema hauna elimu, usitumie kigezo cha kutokuwa na elimu kutokuishi kwa kutimiza ndoto yako uliyonayo. Ukisema hivyo basi dunia ya sasa itakushangaa maana asilimia themanini na tano ya matajiri wengi duniani elimu yao ni ya kawaida sana, na wengine kwa kushangaza zaidi ulimwengu hata kwa kuwa na mafanikio makubwa pamoja na elimu zao za darasa la saba na wamefanikiwa sana. Inawezekana kuifikia ndoto yako kama utamua kutoka ndani ya moyo wako na kujiwekea malengo timilifu utakayotembea nayo, ili kukupa hatua ya kufika mbali zaidi kule unakotaka. Hakuna uchawi bali ni uamuzi wako; kubali na acha visingizio.

7: Hao wameshaandikiwa kuwa matajiri tangu wamezaliwa. Mimi hataa sio wa upande huo.

Maneno yako ndio yanaonyesha wapi unapoelekea, na vitendo vyako vinaleta uhalisi wa kile ulichokipanga. Hivyo basi, kumbe kwa maneno ya kinywa cha mtu unaweza kumtambua mtu atakuwa wapi kwa miaka mitano hapo badae, na kwa uamuzi wake wa kuchukua hatua ya utekelezaji utaona kwa uhalisi kile alichokuwa akikisema na kumaanisha. Kama tayari umekuwa ni mtu wa kukiri kuwa mafanikio ni ya baadhi ya watu fulani hapa duniani, unategemea vipi kuona mafanikio hayo yakitokea katika maisha yako! Usitegemee kupika nyama ya mbuzi wakati wa kula mezani ukategemea kuona nyama ya kuku. Huo utakuwa ni muujiza mkubwa ambao haukuwahi kutokea ulimwenguni kote.

Mara nyingi masikini huwa wanachukua nafasi ya kulalamikia watu wanaofanikiwa na kuwaona kama si wenzao wanaoweza kuwa pamoja nao au kupata msaada wowote kutoka kwao. Wakati unapoona mafanikio ni ya watu fulani tu, ndio unapozidi kupunguza upeo wa akili yako katika kufikiri na kuchukua hatua juu ya maisha yako. Jifunze kwa waliokutangulia na acha kuwaona watu waliokutangulia kama sehemu ya watu fulani wa pekee duniani. Amini nawe unaweza na amini daima unaweza kuliko mtu mwingine yoyote yule.

Sababu na maneno mengine ni kama vile; sina hela ya kutosha nasubiri nipate; sina muda wa kutosha nikipata muda nitafanya. Nakumbia kwa njia yoyote ya sababu hizo na nyinginezo za maneno kama hayo, huwezi kuona hatua yoyote utakayoipiga kwa ajili ya maisha yako na kufanikisha ndoto yako uliyonayo. Kimbia visingizio na amini unaweza kuanzia sasa. Ushindi ni kwa ajili yako; una nguvu; una uwezo mkubwa ndani yako; una muda; una watu wa kukusaidia; kwa nini usitumie vitu vyote hivyo kama sehemu ya kukusaidia kufanikiwa na kufikia ndoto yako. Amua leo hii na jiamini kutoka katika moyo wako hakika utafika mahali unapotaka kufika.