Waziri Lukuvi azindua baraza la ardhi na kulitaka kuwa nguzo ya kujenga umoja na amani Manyara.

Waziri wa ardhi, nyumba, maendeleo na makazi Mh. William Lukuvi amelitaka baraza la ardhi na nyumba wilayani Kiteto mkoani Manyara kuwa nguzo muhimu ya kujenga umoja na amani kati ya wakulima na wafugaji waliokuwa wametofautiana na kusababisha mauaji ya kinyama wilayani humo hususani katika hifadhi ya jamii ya Emborley Murtangos.

Mh. Lukuvi ametoa agizo hilo wakati wa uzinduzi wa baraza hilo likiwa kati ya mabaraza 47 yaliyoahidiwa na rais Dr John Magufuli katika kipindi cha kampeni za uchaguzi mkuu huku akisema litakuwa chombo kitakachojenga amani na umoja kwa jamii hizo zilizotofautiana na kuacha kuchukua sheria mkononi lakini pia likitoa ahueni kwa kuacha kupeleka malalamiko yao wilayani Simanjiro.

 

Nao baadhi ya wananchi wa mjini Kibaya yalipo makao makuu ya wilaya hiyo wamesema lazima baraza hilo lizingatie uundwaji wa wazee wa baraza kwa pande zote mbili kati ya wakulima na wafugaji ili kuondoa hisia za upendeleo wa maamuzi.

 

Kwa upande mwingine Mh. Lukuvi amesema serikali imejizatiti kumaliza mgogoro wa ardhi wilayani Kiteto kwa kupeleka makampuni yatakayopima mashamba na wananchi watapaswa kulipia kodi ya shilingi 400/- kwa mwaka na kupewa hatimiliki huku akikemea ujenzi holela mijini.