Uchaguzi Serikali za Mitaa watengewa Sh5 bilioni

Waziri Mkuu, Mizengo Pinda akiwasilisha makadirio ya matumizi ya Ofisi yake na Ofisi ya Bunge kwa mwaka wa fedha 2014/15, wakati wa kikao cha Bunge mjini Dodoma jana. Picha na Edwin Mjwahuzi

Dodoma.

 Waziri Mkuu, Mizengo Pinda jana aliwasilisha bungeni, bajeti ya ofisi yake na mfuko wa Bunge inayofikia Sh5.21 trilioni. Kati ya hizo, Sh5 bilioni zimetengwa kwa ajili ya uchaguzi wa Serikali za Mitaa uliopangwa kufanyika baadaye mwaka huu.

Hayo yalielezwa bungeni jana na Waziri wa Nchi, Ofisi ya Waziri Mkuu (Tamisemi), Hawa Ghasia wakati wa maelezo kuhusu kazi zilizotekelezwa mwaka 2013/2014 na mwelekeo wa kazi zitakazotekelezwa 2014/2015.

Ghasia alisema shughuli zitakazogharimiwa na fedha hizo ni pamoja na maandalizi ya masanduku ya kupigia kura, kupitia kanuni za uchaguzi na kuandaa fomu na nyaraka mbalimbali za uchaguzi.