Mambo 5 Ya Kukusaidia Kudumu na Kuishi Katika Hamasa Ili Kuifikia Ndoto Yako

Mafanikio yoyote katika maisha huwa yanategemea sana nidhamu na tabia kadhaa ambazo zinaweza kuwa msaada mkubwa kwa muhusika anayehitaji kuona mafanikio hayo yakitokea katika maisha yake. Mtu yoyote mwenye kuhitaji mafanikio fulani anahitaji kutengeneza nidhamu pekee zitakazompa nafasi kubwa ya kufikia mahali husika anapopataka, na hasa katika ndoto yake. Ni vigumu sana kufanikiwa sawa na wengi wanavyozani hasa katika maisha yetu, kama hututochukua hatua mbadala na pekee ya kujenga nidhamu njema zinazoweza kuwa mchango mkubwa katika mafanikio yetu tunayoyahitaji.

Utakubaliana na mimi ya kuwa; kama unahitaji kufanikiwa katika maisha na kufikia ndoto yako ni muhimu sana kujenga tabia na nidhamu ya hali ya juu katika maisha; hasa katika eneo la vitendo na katika kujenga nidhamu ya kuchukua hatua ndogo kila siku zinazoweza kuwa sababu kubwa za kukusaidia kufikia ndoto yako uliyonayo. Kumbuka kuwa hakuna mafanikio yanayoweza kutokea ghafla kwa kulala masikini na kuamka tajiri, ni lazima uhakikishe unalipa gharama.

Kila mtu unayemwona amefanikiwa katika maisha yake na kuishi katika kiwango fulani kizuri cha kiuchumi, fedha au kuwa mwenye furaha; hakika ukifatilia katika maisha ya mtu huyo utakuta ipo gharama aliyoiingia kwa ajili ya kuhakikisha anailipa na kufikia mahali alipofikia leo hii. Watu wengi huwa tunapenda sana kufanikiwa ila hatupendi kulipa gharama za mafanikio tunayoyahitaji; na mojawapo ya gharama zinaweza kuwa ni kutafuta maarifa na kujifunza zaidi ili kujenga na kuboresha fahamu zetu, kutokukata tamaa kwa haraka, kukubali kuumia kwa ajili ya kuifikia na kutimiza ndoto yako.

Katika makala hii ya leo nataka kukusaidia na kukupa ufahamu wa namna gani ya kujenga hamasa katika maisha yako na kudumu katika hali ya hamasa hiyo ili kukusaidia kufikia ndoto yako. Huwezi kufikia ndoto yako kama hutokuwa na sehemu inayokuchochea na kukusukuma katika kufikia ndoto hiyo. Mojawapo ya siri kubwa niliyojifunza juu ya kufanikisha jambo lolote lile katika maisha, ni kuhakikisha unalipa kwanza gharama inayohitajika kulipwa juu ya jambo husika ili uweze kufanikiwa kwa wakati wake.

Haya ndio mambo 5 unayohitaji kujenga, kuishi na kuyafanya kila siku ili kuweza kujijengea hamasa na nafasi kubwa zaidi katika kufikia ndoto yako kwa uharaka.

1: Jenga shauku ya kuifikia ndoto yako.

Kama kweli unahitaji kuwa sehemu ya watu waliofikia katika ndoto zao na kuwa mashujaa wa kweli wa dunia; tambua hauna budi kuwa na shauku ya kiwango cha juu cha kufikia ndoto yako uliyonayo. Kumbuka jambo lolote unalohitaji kufanikiwa katika maisha linahitaji kiwango cha juu sana cha hamasa kutoka ndani yako ili uweze kulifikia; na kama hautoweka shauku ya kulifanikisha ni vigumu sana kulifanikisha; hii ni kwa sababu utakuwa unakosa hamasa ya kutosha ya kukusaidia kukupa mwelekeo wa kule unapotaka kwenda.

Katika kufanikisha jambo lolote lile likiwemo la ndoto ya maisha yako, ni muhimu kwanza kujenga tabia ya kuwa na shauku juu ya eneo husika unalohitaji upate mafanikio hayo. Hakikisha unajenga njaa na kiu ya kiwango cha juu ya kufanikiwa juu ya ndoto yako. Usikubali kuishi maisha uliyonayo sasa, usikubali kuwa mtumwa siku zote katikati ya watu wenye uwezo; amini na wewe una uwezo mkubwa ndani yako; amua kuweka shauku juu ya ndoto yako, amini utafanikiwa.

2: Jitoe na wekeza zaidi katika kujifunza bila kuchoka.

Angalia ni muda gani unaotumia kila siku katika kujifunza kila siku mambo mapya ya kukupeleka katika kilele cha mafanikio yako. Mtu mwenye njaa ya kufanikisha ndoto yake huwa ni mtu anayehakikisha anajifunza mambo mapya kila siku yanayoweza kuwa msaada mkubwa katika kumpa ujunzi na uwezo mkubwa na wa kipekee wa kufikia ndoto yake.

Ni vizuri ujenge tabia ya kujisomea vitabu, kusikiliza na kuangalia mafundisho mazuri ya kukuhamasisha juu ya kufikia ndoto yako. Amua kuwekeza katika kujifunza kwanza kabla ya kukimbilia kufanya jambo lolote lile; watu wenye njaa ya kufanikiwa ni watu wenye kujitoa zaidi katika kujifunza mambo mapya kila siku; ni wasomaji wa viatabu; ni wasomaji wa makala za kuwahamasisha; ni watu wenye kuhudhuria semina na warsha mbali mbali za kuwajenga kiakili na kiufahamu ili kufikia ndoto zao. Fanya hivyo na wewe ili kuweza kukamata nafasi ya juu ya mafanikio yako na kuweza kufikia ndoto yako uliyonayo.

3: Kuwa mbali na watu wenye kukukatisha tamaa.

Amua kukimbia na kuwa mbali na watu wa namna hii. Kimbia watu wenye mawazo na mtazamo hasi juu ya ndoto na maono yako mazuri uliyonayo. Wapo watu wenye tabia ya kukatisha tamaa watu wengine, na ni watu wenye kukosoa kila kitu kizuri unachoamua kukifanya ilimradi wakuone hufanikiwi katika maisha yako; na wakati mwingine yawezekana ni watu wa karibu waliokuzunguka; hakikisha unawakimbia na kukaa mbali nao.

Kuwa karibu na watu wenye tabia na mtazamo hasi juu ya kile unachotamania kukifanya au kukifikia katika maisha yako, kunaweza kuwa sababu kubwa ya wewe kutofikia kufanikiwa katika ndoto yako. Watu wa namna hii wanaweza kukupotezea hamasa na njaa ya kukimbilia katika kufikia ndoto yako kwa wakati. Amua kuwakimbia na kuwa mbali nao.

4: Usikubali kupoteza muda wako kwenye mambo yasiyo na mchango katika ndoto yako.

Tambua ya kuwa, malengo na mipango mizuri ya kukupa hatua ya kuchukua kila siku kwa ajili ya kufanikisha ndoto yako ni jambo la muhimu sana, hasa kwa ajili ya kufanikisha ndoto yako uliyonayo na kukwepa kupoteza muda kwenye mambo yasiyo ya msingi na faida kwako. Jiwekee malengo yaliyo wazina yanayofikika (specific and realistic goals) yatakayokusaidia kufikia ndoto yako pasipo kujichanganya katika kufanya mambo mengine nje ya kile unachokitaka.

Chagua mambo machache ya kufanya kila siku yatakayokupa hatua na hamasa kubwa ya kufikia ndoto yako uliyonayo. Usijaribu kufanya kila kitu katika maisha yako; kufanya kila kitu katika maisha ni kuchagua kufeli katika kila kitu. Fanya mambo machache kila siku yenye matokeo makubwa juu ya ndoto yako na ambayo yatakupa hamasa kubwa ya kuendelea mbele zaidi.

5: Jitie moyo kwa mafanikio madogo unayoyapata na songa mbele.

Kama unahitaji kubaki kwenye hamasa ya kweli ya kukufikisha kwenye ndoto yako, ni muhimu sana kukubali matokeo madogo unayoyapata kila siku katika maisha yako. Usikubaliane na udanganyifu wowote wa kimawazo wa kutokukubaliana na kile kidogo unachokifanikisha; kwa maana katika kidogo hicho unachopata ni hatua tosha ya kukupa mwelekeo wa kufika katika mafanikio makubwa zaidi unayoyataka.

Tumia mafanikio madogo unayoyapata kila siku katika malengo yako uliyojiwekea kama sehemu ya kukupa hamasa na njaa kubwa ya kuendelea mbele zaidi katika kuifata na kuifanikisha ndoto yako kubwa uliyonayo. Kumbuka hakuna ndoto isiyowezekana kutimia, ila ni muhimu kujenga nidhamu mbali mbali zinazoweza kukusaidia kufanikiwa na kufikia ndoto yako uliyonayo; na nidhamu mojawapo ni kujijengea nidhamu ya kujihamasisha kila siku ili kufikia ndoto yako nzuri uliyonayo.

JIAMINI NA AMINI UNAWEZA. ISHI NDOTO YAKO.