Serikali yakamata kiwanda bubu cha kufungashia sukari eneo la Soweto Mbeya.

Serikali mkoani Mbeya imekamata kiwanda bubu cha kufungasha sukari,kikiwa kwenye makazi ya watu katika eneo la Soweto jijini Mbeya ambacho kinatuhumiwa kufungasha sukari katika mifuko midogo yenye ujazo wa kati ya nusu kilo na kilo moja na kisha sehemu ya sukari hiyo kuiuza nje ya nchi na nyingine kusambazwa mitaani na kuwauzia wananchi kwa bei kubwa.

Mwenyekiti wa Kamati ya Ulinzi na Usalama ya wilaya ya Mbeya,Nyerembe Munasa Sabi akiongozana na askari wa Jeshi la Polisi ameingia mitaani kutekeleza agizo la Rais Dk.John Pombe Magufuli la kuwasaka wafanyabiashara wanaoficha sukari, na ndipo akafanikiwa kubaini kiwanda bubu cha kufungasha sukari kinachodaiwa kufanya kazi hiyo kinyume cha sheria na ndipo akaingiwa na hofu kuwa huwenda kiwanda hicho kinafungasha sukari iliyokwisha muda wake na kuwauzia wananchi.

 

Baada ya kukamatwa,mmiliki wa kiwanda hicho ambaye pia ni mfanyabiashara maarufu wa sukari jijini Mbeya,Bushir Sanga yakaibuka malumbano makali dhidi yake na Mkuu wa wilaya kuhusu aina na uhalali wa mifuko inamofungashiwa sukari hiyo.

 

Baada ya kujiridhisha kuwa mfanyabiashara huyo hana kibali cha kufungasha bidhaa hiyo kutoka kwenye viwanda vya sukari vya ndani ya nchi,Mkuu huyo wa Wilaya akaamuru mfanyabishara huyo akamatwe ili akatoe maelezo polisi.