Wakati nasoma historia ya watu mbalimbali waliofanikiwa duniani na
walioweza kutengeneza fedha na utajiri mkubwa kutokana na kufuata na
kuishi ndoto zao, nilishangaa sana kuona ni jinsi gani watu hawa
walikopitia hadi kuweza kufanikiwa pamoja na mazingira magumu yaliyo
wazunguka ila hawakuruhusu mazingira hayo kuwa kikwazo kwao cha
kufanikisha ndoto walizokuwanazo. Ukifatilia historia za watu hawa
unaweza ukajifunza kitu kikubwa sana ambacho kinaweza kukufanya na wewe
uone wepesi wa kufanikiwa katika maisha yako na hatimaye kuona uhalisia
wa kutimiza ndoto yako.
Baadhi ya watu hawa wachache wafuatao wanaweza kukushangaza sana
utakaposoma historia ya mahali walipoanzia hasa katika mazingira
waliyotokea na kuweza kufanikisha ndoto zao pamoja na mazingira yao kuwa
magumu sana kwao, lakini cha ajabu hawakuzuiwa na mazingira hayo hadi
walipoona wamefanikisha ndoto zao. Hawa ni wajasiriamali wakubwa duniani
waliowahi kuishi na wengine wanaoishi hadi hivi leo.
1: Henry Ford alianzisha kampuni yake ya Ford Motor Company
akiwa ndani ya gereji yake. Leo hii kampuni ya Ford ni mojawapo ya
kampuni inayozalisha magari mazuri na ya thamani kubwa duniani ingawa
Ford mwenyewe alishafariki ila anakumbukwa kwa ushujaa wake. Hii ni
pamoja na Ford kupitia mazingira magumu kimaisha hata kuwahi kufanya
kazi chini ya Thomas Edison mwanzilishi wa kampuni wa General Electric
na badae kuweza kuanzisha kampuni yake ya Ford Motor.
2: Michael Dell alianzisha Dell
Computers akiwa ndani ya Bweni la chuo chake (college dorm room). Leo
hii kampuni ya Dell ni miongoni mwa kampuni kubwa duniani
inayojishughulisha na utengenezaji wa kompyuta na vifaa vingine
mbalimbali vya kieletroniki kama vile kamera, printa, nakadhalika.
3: Steve Jobs alianzisha kampuni yake ya Apple
akiwa ndani ya gereji baada ya kupitia mazingira magumu. Leo hii
naamini hakuna mtu hasiyefahamu kampuni ya apple kama mojawapo ya
kampuni inayozalisha bidhaa za kieletroniki zilizo bora zaidi na za
thamani kubwa kuliko kampuni nyingine yoyote ile duniani. Bidhaa kama
vile simu janja za Iphone, kompyuta za Apple Mac, Saa, Tv, tablet,
nakadhalika. Leo hii Jobs naweza kumfananisha na mtu aliyekufa ingawa
anaishi, hii ni kutokana na kutimiza ndoto yake kubwa ambayo dunia nzima
inanufaika nayo.
4: Sergey Brin na Larry Page waliweza kuanzisha kampuni ya Google
wakiwa chuoni. Hapo ulipo naamini unafahamu kabisa haiwezi kupita siku
kama unatumia kifaa cha inteneti husiweze kutumia Google kwa ajili ya
kuweza kupata taarifa mbalimbali unazozitaka mtandaoni. Hii ni kutokana
na watu wawili ambao hawakuangalia mazingira yaliyowazunguka wakiwa
chuoni wakatumia fursa ya muda wao walioupata kugundua mtandao wa Google
na leo hii umekuwa na faida kwa watumiaji maelfu na elfu wa mtandao wa
inteneti.
5: Mark Zuckerberg ambaye ni mwanzilishi na mmiliki wa Facebook.
Mark aliweza kuanzisha facebook miaka 12 iliyopita tangu hapo February
4, 2004 akiwa katika chuo kikuu cha Harvard pamoja na wenzake ambao ni
Eduardo Saverin, Andrew McCollum, Dustin Moskovitz, and Chris Hughes.
Hii ni wazi kuwa mazingira ya chuo hayakuwa kikwazo na sababu kubwa kwa
Mark kuitimiza ndoto yake aliyokuwa nayo. Jiulize wewe ni mwanafunzi
ukiwa upo chuo muda huu au mahali popote pale, ni ndoto gani uliyonayo
muda huu ambayo una hofu ya kuitimiza hadi sasa kutokana na mazingira ya
shule uliyonayo? Tumia unachosomea kuwa sababu ya kufikia ndoto yako,
na si elimu unayopata kuwa kikwazo cha kufika mahali unapotaka.
6: Hewlett na Packard ni waanzilishi na wamiliki wa kampuni ya HP
ambao kwa majina yao halisi ni William “Bill” Redington Hewlett na
David “Dave” Packard. Hawa ndio watu wawili walioanzisha kampuni ya
teknolojia ya HP inayotengeneza kompyuta na programu (software)
mbalimbali za kompyuta. Walianzisha kampuni yao kwa mara ya kwanza
wakiwa ndani ya gereji.
7: Bill Gates ambaye ndio tajiri wa
kwanza duniani hadi hivi sasa anayejishughulisha na kuuza programu za
kompyuta zilizo katika mfumo wa programu zake anazotengeneza mwenyewe za
Microsoft. Bill
Gates anauza programu (software) zake katika kampuni ndogo ndogo
zinazojishughulisha na mambo ya kompyuta, nakadhalika. Aliwahi
kukataliwa mara nyingi kabla ya kufanikiwa kama anavyoonekana hivi leo,
na zaidi sana leo hii ndiye tajiri wa kwanza duniani kwa mujibu wa
orodha ya jarida la Forbes.
Leo hii kompyuta nyingi duniani zinatumia mfumo na programu za
Microsoft hii ni kwa sababu ya mtu aliyekataliwa kutokana na ndoto yake
aliyokuwa nayo lakini hakukata tamaa hadi akafanikisha ndoto aliyokuwa
nayo.
Hao wote na wengine wengi sana ambao sitoweza kuwaandika wote mahali
hapa, ni sehemu tosha ya funzo kwangu na kwako pia hasa juu ya kuzifuata
na kuzifanikisha ndoto zetu tulizonazo. Nikuulize swali, Ni ndoto gani
uliyonayo leo hii ambayo umekuwa ni mgumu kuifanikisha kutokana na
mazingira uliyonayo au yaliyokuzunguka muda huu?
Nataka nikuambie mazingira yaliyokuzunguka ni muhimu sana kwa ajili
ya kufanikisha ndoto yako uliyonayo muda huu, haijalishi mazingira hayo
yapo namna gani na ndio maana Mungu akakuweka katika mazingira hayo ili
uweze kutengeneza ushuhuda na kuwa msaada na faraja kwa wengi.
Usitegemee mazingira yoyote mengine unayoweza kuyapata ili uweze kuanza
kuchukua hatua juu ya ndoto yako. Mazingira uliyonayo muda huu hapo
ulipo ndio yanayoamua hatima njema ya ndoto yako, haijalishi upo chuoni
kama Mark Zuckerberg au upo mazingira ya gereji kama Steve Jobs na Henry
Ford, au upo mahali popote pale kwenye mazingira unayoona ni magumu
kwako iwe ni kijijini hakuna umeme, nakadhalika. Nataka kukuambia
mazingira hayo hayo uliyonayo muda huu ndio yatakayoamua hatima njema ya
mafanikio ya ndoto yako.
Anza leo kutimiza ndoto yako pasipo kuzuiliwa na lolote ili uweze
kuona matunda makubwa juu ya maisha yako. Hebu jiulize kama Michael Dell
angeamua kuangalia mazingira aliyokuwa nayo leo hii tungepata wapi
kutumia kompyuta zake za Dell. Kama Mark Zuckerberg angeamua kuangalia
mazingira ya chuo aliyonayo leo hii tungepata wapi kuwasiliana na
kujuana kama tulivyo hivi sasa na kusaidiana kupitia mtandao wa
facebook. Nataka kukuambia unapopoteza fursa ya kufanya kitu kizuri
ulichonacho kutokana na kuangalia mazingira ya mahali ulipo, basi
unakuwa unapoteza nafasi kubwa ya kusaidia wengine na zaidi sana na wewe
kupiga hatua kubwa kwenda mbele unayotakiwa kufika kwenye muda huu
ulionao.
Amini katika uwezo ulionao na chukua hatua katika hayo mazingira
uliyonayo na hakika utaona mafanikio yako yakitokea mapema zaidi.
JIAMINI NA AMINI UNAWEZA. ISHI NDOTO YAKO.
Post a Comment